Coluna Italiana
27/02/2004

CENTRO CULTURAL ITALIANO DE PALOTINA
GL´ITALIANI CON LA PAROLA
Por Lirio João Lolatto

STÒRIA E FRÒTOLE
La Mula de Bepin

Bepi l´è sempre stato a Linha Un, en distreto de Ivorà. Fiol de migranti, persona de religion. Messa tute le domeneghe, e così via. Dea Linha Un a Ivorà, i ze cinque, sie chilometri, strada che Bepi, quando l´era vivo, la fea sempre su la mula. Na mula mansa svelta, bela. Par rivar a Ivorà, dea so casa, ghe tocava passar quatro rii: due picoleti, un grando, el rio Melo e nantro grandeto, el rio Jacutinga.
El rio Melo, tel ano de 1985, tea bruta insente de maio, el ga spaurà medo mondo. El Jacutinga, che´l passa giusto in medo la vila de Ivorà, el ga fato cose mai fate. El ga butà do tochi de case, trato do baranchi e altri stringamenti.

Ma, Bepi el ghea tanta stima de la so mula, che mai no ghe dea, gnanca pa scherso. El portava na bacheta e un sicoto sol pa spaurirla, ma bote mai. Basta dir che lu tanto la tendea, la tratava tanto ben, che la ga ciapà el fiaco del paron e lo ciolea, come se dise , pal sesto. Tute le volte che la passava un rio zo bever aqua, e lu la dassava li, fin che la finia. Dopo, però, ghe tocava trotiar un bel poco pa poder ciapar i altri che romai i gera pi vanti. Un di de fredeto, nel primo fiume, la sbassa la testa e no la tirava pi su de tanto bever. L´è stà el colpo che lu el desconfia de qualcosa. El se ga sbassà un poco, stando stesso a caval, e el ga visto che no la ingiuntia nessuna aqua. Sol la ghea el naso e la boca piantai tel aqua, in tanto che la smissiva la rece una par davanti e una par dadrio.

Bepi el ciapa, daghe un tiron te le rèdene e el dise tra de lu solo: Questo vìssio te lo tolo sùbito, tel primo rieto che catemo da qua in vanti. E da vero! Vanti rivar el pròssimo rieto, el se ferma, el desmonta do dea mula, el se tol su du bei sassi, el monta su ancora e vanti. Co i riva al rieto, la mula rento l´aqua, la sbassa la testa e la fa finta bever. Lu el se piega un poco, el varda e el vede che no la bevea mia. Sol la ghea la boca tocada tel aqua. Lora, el ciapa un sasso, el varda, el ghe smira polito, e patatùnfete na sassada rente la boca. Co quel colpo, ghe ga fato vegner su l´aqua, la mula la ga ciapà un pi bruto spauron, la ga dà un corcovion e Bepi no se la spetava mia, l´è ndato do drito rento l´aqua e la mula vanti a troto, come se gnente fusse, fin ciapar i altri, che i gera un cento metri distante. Questi, co i vede la mula sensa Bepi, sguelti i torna in drio e i vede Bepi che l´era romai drio rivar fora de l´aqua, tuto moio come un pitusso sbandonà de la cioca in te un giorno de piova. Se de li in vanti la mula la ga perso el vissio, nessun lo sa, parchè li se ga finio la stòria. Cossi Bepi el se ga fato la tràpola per ciaparse lu pròprio rento.

>>voltar para capa