Coluna Italiana
20/02/2004

CENTRO CULTURAL ITALIANO DE PALOTINA
GL´ITALIANI CON LA PAROLA
Por Lirio João Lolatto

STORIE E FROTOLE 
L´auto Rùdine

Questa la ze sucedesta tea nostra capela, tea festa de San Joan, parchè se fa na festa al ano e la prima la ze in genaro. Tutti i se parècia, i va a messa, i compra el sorrasco, che i lo magna tel pavilion pròrpio. Tanti, che, i pitarei, soratuto quei dei polinari grandi i se lo porta a casa e i lo magna là, in fameia.

Um me compare el se ga parecia anca lu per ndar a la festa. El tira fora el auto, tuto rùdine de tanto esser sta fermo e el va anca lu a la festa, ma lu no´l ze de messa, el s´impianta in tea bodega e zo caciassa! Ma la so fémena e la tosa le va a messa. Quando le vien fora, l´è ora de ndar a casa, per portarghe el sorrasco a quei che i è stai casa ténderghe a le bèstie.

Ma, me compare l´era belche pronto, lora la so fémena la ciapa la diression del auto, perchè lu zera belche stufo. Ma ela no la sa mia tanto de ste robe. E la so tosa la vol ndar casa co la motocicleta del so moroso, che, per fortuna, l´è mecànico. Fin casa, tuto bene!

Co i riva casa, la fémena se sente in coraio da meter el auto rento la garage, che la ze vècia, smarsa e pìcola. La va rento tuto polito, ma co ze ora da fermarse, no la se ga pu ricordà come far, e la tra in vanti parete e tuto. Ma, ghe gera dei sassi li davanti, l´è saltada sora sti sassi e l´auto l´è resta li fermo, in balanso, co le rode per ária, no´l ndea ne ivanti ne indrio. Lora, sta dona, la salta fora spaurada. Lora l´è el colpo de me compare che´l salta fora e el dise: "Speta che vago rento mi, veder cosa che ghe ze." Ma, pien come un ovo, el va rento, el ciapa la diression e el scomìsia pararla torno in le maniere e dopo el se volta e el ghe dise: sicuro che no´l va vanti, gnanca indrio, perchè te ghe spacà la diression. Te quela riva la tosa col moroso, che l´era mecànico. Lora, lu el varda, e el vede che ghe toca méterghe dei sassi soto la roda, pa poder tornar indrio. Così l´auto l´è tornà al so posto. No se ga gnanca strucà gnente, parchè el parassoche lo ga salvà.

Lora, me compare, el varda sto auto, ma el ghen vedea du o tri, parchè l´era pien pi che on oco, e el ghe dise a so fiol: Ciò, bisogna che mi vae proarlo in strada, pa veder se te lo ghè giustà pròprio.

Nò, Nò, dise la gente che i era li, l´è mèio che lo proe el mecànico, che´l sa mèio de vu come far. Lora, me compare el se volta, come da cativo, e el dise: "No lo digo sempre mi che no go mai rason!" Da vero, me compare no´l gavea rason, parchè la caciassa ghe la gavea belche tolta! Per ver rason bisogna meritàrsela!

La Angura de 8 Kili

Sti anni, quando i nostri taliani i ze vegnesti in Brasile ghe gèra un tal de Bepi mezzo strambo. Un giorno el ga deciso de andare as passo con tren.
Alora na domenega el se mete su la meio roba e el va ala stacione per ciapar sto tren.
E li el vede bele angurie...
E lora intanto che´l tren n´ol riva li pròrpio nela stacione el se compra na anguria che la gavea in torno de 8 kili e la se ga magnada tuta.
Co la ga finio de magnarla el ghe davea davanti na pi bruta pansa che´l pareva pròprio un rospo de que´l de piova.
Riva sto tren lora...
Sto Bepi el và sù e el se senta te un banco dove ghe gèra romai na dona che la gavea na tozeta piccinina tei brassi.
El tren el parte... Ma sta tozeta no la volea mia star ferma. Alora so mare sensa saver cossa far, la ghe proa darghe da chuchar na teta... Ma la tozeta gnanca cossi no la vol mia star ferma e gnanca chuchar la teta.
So mare co la vede che la tozeta no la vol mia chuchar, la ghe dize:
Chucha fiola... chucha... se nò la teta la dao al Zio qua de la me banda èh...
Ma la tozeta no la capisse, e so mare lora la ghe proa dirghe nantra volta:
Chucha fiola... chucha... se no la teta la dao al Zio qua de la me banda èh...
Sto Bepi, quando el vede che´l mestiero el diventa sèrio e che la dona no la cambiava de idea, el se volta a sta dona e el ghe dize:
Cara signora... escuzeme... ma la teta no la vol mia mi, perchè go magna na bruta anguria e go paura che´l late me fa male...

>>voltar para capa